.png)
આમળા પોષક તત્વોથી ભરપૂર ફળ હોય છે. જેમાં ભરપૂર માત્રામાં એન્ટી ઓક્સિડેન્ટ મળે છે. આમળામાં પોટેશિયમ, કાર્બોહાઇડ્રેટ, ફાઇબર, પ્રોટીન્સ, વિટામિન ‘એ’, ‘બી’ કોમ્પ્લેક્સ, મેગ્નેશિયમ, વિટામિન ‘સી’, આયર્ન વગેરે ભરપૂર માત્રામાં હોય છે.
આમળામાં નારંગી કરતાં 20 % વધારે વિટામિન ‘સી’ હોય છે. આ સાથે જ સૌથી ખાસ વાત એ કે ગરમ કરવા પર પણ વિટામીન ખતમ થતાં નથી. હંમેશા સ્વસ્થ રહેવા માટે રોજ એક આમળાનું સેવન કરવાની સલાહ આપવામાં આવે છે.
વિટામીન સીની ઉણપથી મોમાં ચાંદા પડે છે. આથી આમળાનું સેવન કરવું ખૂબ ફાયદાકારક હોય છે. આમળાની છાલને વાટીને થોડીવાર મોમાં રાખવાથી તેમજ દિવસમાં 2થી 3 વાર કોગળા કરવાથી મોંના ચાંદા ઠીક થઇ જાય છે. આ ઉપરાંત આમળા ઉકાળીને પેસ્ટ બનાવીને ચાંદા પર લગાવવાથી સારૂ થઇ જાય છે.
પેટને લગતા રોગો દૂર કરવામાં પણ આમળા ઉપયોગી છે. આમળાનું સેવન ડાયેરિયા જેવી પરેશાનીઓને દૂર કરે છે. આ ઉપરાંત જો સમય પર ભૂખ ના લાગતી હોય તો આમળાનો પાઉડર, મધ અને માખણ મેળવીને ખાવું જોઇએ. આ રીતે લાભ મળે છે. જો તમારા પેટમાં ખૂબ વધારે બળતરા થતી હોય તો આમળાનું સેવન કરવું જોઇએ.
એસિડિટીમાં એક ગ્રામ આમળા પાઉડરમાં થોડી ખાંડ મેળવીને પાણી અથવા દૂધ સાથે લેવામાં આવે તો ખૂબ રાહત રહે છે. મધ સાથે આમળાનું ચૂરણ ખાવાથી મગજની કાર્યક્ષમતા વધે છે. જો આમળાને તલ સાથે મેળવીને 20 દિવસ સુધી ખાલી પેટ ખાવામાં આવે તો એનર્જી મળે છે.
.png)
