સીબીએસઈના વર્તમાન સચિવ (IAS) હિમાંશુ ગુપ્તાને પણ પદ પરથી હટાવવામાં આવ્યા

CBSEની ‘ઓન-સ્ક્રીન માર્કિંગ’ (OSM) સિસ્ટમને લઈને ઉભા થયેલા વિવાદ બાદ કેન્દ્ર સરકારે મોટો પ્રશાસનિક પગલું ભર્યું છે. આ મામલામાં અસરગ્રસ્ત વિદ્યાર્થીઓના મુદ્દા અને ગડબડીના આરોપો સામે આવ્યા પછી સીબીએસઈના ચેરમેન રાહુલ સિંહનું ટ્રાન્સફર કરવામાં આવ્યું છે. સાથે જ સીબીએસઈના વર્તમાન સચિવ (IAS) હિમાંશુ ગુપ્તાને પણ પદ પરથી હટાવવામાં આવ્યા છે. સરકારના આ નિર્ણય બાદ શિક્ષણ વિભાગમાં હલચલ જોવા મળી રહી છે.

એક તપાસ સમિતિ બનાવી

માહિતી મુજબ, રાહુલ સિંહ સીબીએસઈની સમગ્ર પરીક્ષા વ્યવસ્થા અને પરીક્ષા સુધારણા સંબંધિત કામગીરી સંભાળતા હતા, જ્યારે હિમાંશુ ગુપ્તા વહીવટ, નાણાં અને સંલગ્નતા સંબંધિત જવાબદારીઓ નિભાવી રહ્યા હતા. આ કાર્યવાહી બાદ સરકારએ OSM સિસ્ટમમાં થયેલી ગડબડની તપાસ માટે વિશેષ કમિટી પણ રચી છે. કેબિનેટ સચિવાલયે એક સભ્યીય તપાસ સમિતિ બનાવી છે, જે OSM સેવા ખરીદી અને પ્રક્રિયાની તપાસ કરશે. આ કમિટીની અધ્યક્ષતા કેપેસિટી બિલ્ડિંગ કમિશન (CBC)ની અધ્યક્ષ એસ. રાધા ચૌહાણ કરશે. કમિટીને એક મહિનામાં પોતાની રિપોર્ટ સોંપવાનો આદેશ આપવામાં આવ્યો છે.

OSM સિસ્ટમમાં ખામીઓ અંગે પોતાનું પ્રેઝન્ટેશન રજૂ કર્યું

આ દરમિયાન સંસદીય શિક્ષણ સમિતિ સમક્ષ 17 વર્ષીય વિદ્યાર્થી સાર્થક સિદ્ધાંત પણ હાજર થયો હતો, જેમણે OSM સિસ્ટમમાં ખામીઓ અંગે પોતાનો પ્રેઝન્ટેશન રજૂ કર્યો અને અનેક પ્રશ્નો ઉઠાવ્યા હતા. ઉલ્લેખનીય છે કે COEMPT કંપનીને મળેલા ટેન્ડર અને તેની પ્રક્રિયા પર પણ પ્રશ્નો ઉઠ્યા છે. આરોપ છે કે કંપનીએ અગાઉ વિવાદ બાદ નામ બદલીને ફરીથી ટેન્ડર મેળવ્યું હતું, જેને લઈને હવે શિક્ષણ મંત્રાલયે પણ અલગથી તપાસના આદેશ આપ્યા છે.