સંસદ કે વિધાનસભામાં વોટ કે ભાષણ માટે લાંચના આરોપોમાંથી સાંસદોને કાનૂની છૂટ આપવા સુપ્રીમનો ઈન્કાર

સુપ્રીમ કોર્ટની સાત ન્યાયાધીશોની બેન્ચે સોમવારે જણાવ્યું હતું કે સંસદ અને રાજ્યની વિધાનસભામાં મત અથવા ભાષણના સંબંધમાં લાંચ લેવાના આરોપમાં કોઈ પણ સાંસદ અથવા ધારાસભ્ય કાર્યવાહીથી મુક્તિનો દાવો કરી શકે નહીં. 

નરસિમ્હા રાવના ચુકાદાના બહુમતી અને લઘુમતી ચુકાદાનું વિશ્લેષણ કરતા ભારતના મુખ્ય ન્યાયાધીશ ડીવાય ચંદ્રચુડની આગેવાની હેઠળના સાત ન્યાયાધીશોએ કહ્યું કે અમે આ ચુકાદા સાથે અસંમત છીએ અને સાંસદો પ્રતિરક્ષાનો દાવો કરી શકે તેવા ચુકાદાને નકારીએ છીએ. સર્વોચ્ચ અદાલતે કહ્યું કે નરસિમ્હા રાવ કેસમાં બહુમતી ચુકાદો, જે ધારાસભ્યોને રક્ષણ આપે છે, તે ગંભીર ખતરો છે.

આ ચુકાદાએ 1998ના ચુકાદાને રદિયો આપ્યો હતો. જેમાં પાંચ જજોની બંધારણીય બેન્ચે સંસદસભ્યો અથવા ધારાસભ્યો ગૃહમાં ભાષણો અથવા મતો માટે લાંચ લેતા હોય તેવા કેસમાં ધારાસભ્યોની પ્રતિરક્ષાને સમર્થન આપ્યું હતું. કોર્ટે કહ્યું કે લાંચને સંસદીય વિશેષાધિકારો દ્વારા સુરક્ષિત નથી અને 1998ના ચુકાદાનું અર્થઘટન બંધારણની કલમ 105 અને 194ની વિરુદ્ધ છે.

લાંચ લેવી એ પોતે જ ગુનો - સુપ્રીમ કોર્ટ

ચુકાદો આપતી વખતે, CJI ચંદ્રચુડે કહ્યું કે કોઈપણ સાંસદ/ધારાસભ્ય વિધાનસભા ગૃહમાં મતદાન અથવા ભાષણના સંબંધમાં લાંચ લેવાના આરોપમાં કાર્યવાહીથી મુક્તિનો દાવો કરી શકે નહીં. સર્વોચ્ચ અદાલતે કહ્યું કે વિધાનસભાના સભ્ય તરફથી ભ્રષ્ટાચાર અથવા લાંચ લેવાથી જાહેર જીવનમાં અખંડિતતાનો નાશ થાય છે અને લાંચ લેવી એ પોતે જ ગુનો છે.

સાત ન્યાયાધીશોની બેન્ચે કહ્યું કે સંસદીય વિશેષાધિકારો અનિવાર્યપણે ગૃહનો છે અને તેની કામગીરી માટે જરૂરી છે. સુપ્રીમ કોર્ટે કહ્યું કે રાજ્યસભા અથવા રાષ્ટ્રપતિ/ઉપરાષ્ટ્રપતિ પદની ચૂંટણીઓ પણ સંસદીય વિશેષાધિકારને લાગુ પડતી બંધારણીય જોગવાઈઓના દાયરામાં આવશે.

5 ઓક્ટોબરે, ભારતના મુખ્ય ન્યાયાધીશ ડીવાય ચંદ્રચુડની આગેવાની હેઠળની સાત ન્યાયાધીશોની બેન્ચમાં જસ્ટિસ એએસ બોપન્ના, જસ્ટિસ એમએમ સુંદરેશ, જસ્ટિસ પીએસ નરસિમ્હા, જસ્ટિસ જેબી પારડીવાલા, જસ્ટિસ સંજય કુમાર અને જસ્ટિસ મનોજ મિશ્રાએ નિર્ણય સુરક્ષિત રાખ્યો હતો.