ગુજરાતમાં ચૂંટણીનો માહોલ હતો ત્યારે આમ આદમી પાર્ટી સોશિયલ મીડિયામાં ભાજપ અને કોંગ્રેસ બંનેને ભારે પડી રહી હતી. જોકે, પરિણામ જાહેર થતાં જ હવે જાણે પિક્ચર બદલાઈ ગયું છે. હવે સોશિયલ મીડિયામાં પબ્લિક આમ આદમી પાર્ટીનો દાવ લેવામાં લાગી છે. ખાસ કરીને ઈસુદાન ગઢવી, અલ્પેશ કથિરિયા અને ગોપાલ ઈટાલિયા ટ્રોલર્સના ટાર્ગેટ પર આવી ગયા છે. વળી, આમ આદમી પાર્ટીએ તો ઈસુદાનને સીએમ કેન્ડિડેટ પણ જાહેર કરી દીધા હતા, પરંતુ પ્રચંડ પ્રચાર કર્યા બાદ પણ પાર્ટી ડબલ ડિજિટમાં પણ બેઠકો મેળવવામાં નિષ્ફળ રહી છે.
સોશિયલ મીડિયામાં આમ આદમી પાર્ટી અને તેના સ્ટાર કેન્ડિડેટ્સની મજાક ઉડાવતા ફોટોગ્રાફ્સ તેમજ જોક્સ પણ વાયરલ થઈ રહ્યા છે. જેમાં એકમાં તો એવું પણ લખવામાં આવ્યું છે કે ઈતિહાસમાં પહેલીવાર ભાવિ સીએમ, ડેપ્યુટી સીએમ અને ગૃહમંત્રી ચૂંટણી હાર્યા છે. ઈસુદાન તો આપના સીએમ ફેસ હતા જ, પરંતુ અલ્પેશ કથિરિયાને હવે ભાવિ ડેપ્યુટી સીએમ અને પૂર્વ પોલીસકર્મી ગોપાલ ઈટાલિયાને લોકો ભાવિ ગૃહમંત્રી ગણાવીને તેમની મજાક ઉડાવી રહ્યા છે. આજે જાહેર થયેલા પરિણામોમાં ભાજપનું બુલડોઝર જે રીતે ફરી વળ્યું છે તેમાં કોંગ્રેસ અને આમ આદમી પાર્ટીના સૂપડા રીતસરના સાફ થઈ ગયા છે.
અરવિંદ કેજરીવાલ છેલ્લે સુધી ગુજરાતમાં પોતાની પાર્ટી સરકાર બનાવશે તેવા દાવા કરતા હતા. દિલ્હી મ્યુનિસિપલ કોર્પોરેશનની ચૂંટણીના પરિણામ જાહેર થયા બાદ પંજાબના સીએમ ભગવંત માને પણ ગુજરાતના એક્ઝિટ પોલ્સની મજાક ઉડાવી હતી. જોકે, હાલ તો આખીય આમ આદમી પાર્ટી જ મજાકનું પાત્ર બની ગઈ હોય તેવું દ્રશ્ય રચાયું છે.
300 યુનિટ ફ્રી વીજળીનું વચન પણ કામ ના લાગ્યું
આમ આદમી પાર્ટીએ 300 યુનિટ ફ્રી વીજળી, બેરોજગારી ભથ્થું, મહિલાઓને સમ્માન રાશિ આપવા જેવા અનેક વચનોની લ્હાણી કરી હતી. કોંગ્રેસ પણ આ જ હરોળમાં સામેલ થઈ હતી. જોકે, ભાજપે આ બધા વચનોને ફ્રીની રેવડી ગણાવી તેની સામે કાઉન્ટર અટેક કર્યો હતો.હવે જ્યારે પરિણામ આવી જ ચુક્યું છે ત્યારે એ પણ સ્પષ્ટ થઈ ગયું છે કે ગુજરાતની જનતાએ આમ આદમી પાર્ટી તેમજ કોંગ્રેસ તરફથી અપાયેલી રેવડીમાં કોઈ રસ નથી દાખવ્યો.
.png)
