વલસાડ જિલ્લામાં ફરી એકવાર આભ ફાટ્યુ, છેલ્લા 24 કલાકમાં કપરાડામાં સાડા 15 ઇંચથી વધુ વરસાદ ખાબક્યો

ગુજરાતમાં સૌરાષ્ટ્ર અને દક્ષિણ ગુજરાતમાં ભારે વરસાદના કારણે તારાજી સર્જાઇ છે

નવસારીમાં દાંડીવાડ વિસ્તારમાં 10 ફૂટ જેટલા પાણી ભરાયા

નવસારીના દાંડીવાડ વિસ્તારમાં પૂર્ણા નદીના પાણીથી જળબંબાકારની સ્થિતિ સર્જાઇ છે. દાંડીવાડ વિસ્તારમાં 10 ફૂટ જેટલા પાણી ભરાયા છે. ગ્રાઉન્ડ ફ્લોરના મકાનો ડૂબી જતા સ્થાનિકોને હાલાકીનો સામનો કરવો પડી રહ્યો છે. નવસારી શહેરમાં સિટી બસ સેવા બંધ કરાઇ છે.

વલસાડ જિલ્લામાં ફરી એકવાર આભ ફાટ્યું

વલસાડ જિલ્લામાં ફરી એકવાર આભ ફાટ્યું છે. જિલ્લાના તમામ તાલુકાઓમાં સાંબેલાધાર વરસાદ વરસ્યો છે. છેલ્લા 24 કલાકમાં કપરાડામાં સાડા 15 ઈંચથી વધુ વરસાદ વરસતા જળબંબાકારની સ્થિતિ સર્જાઈ છે. તો ધરમપુરમાં સાડા 13, ઉમરગામમાં સાડા 8, વાપીમાં સાડા દસ, પારડીમાં સાડા અગિયાર ઈંચ વરસાદ ખાબક્યો છે. હજુ પણ જિલ્લામાં ભારે થી અતિભારે વરસાદની આગાહી કરવામાં આવી છે. ભારે વરસાદને લઈને વલસાડ ઔરંગા નદીની આજુબાજુના ગામોને એલર્ટ કરાયા છે. 350થી વધુ લોકોનું સ્થળાંતર કરીને તેમને સલામત આશ્રયસ્થાનોમાં ખસેડાયા છે.

પૂર્ણાં નદીમાં ઘોડાપુર

ભારે વરસાદને પગલે પૂર્ણાં નદીમાં ઘોડાપુરની સ્થિતિનું નિર્માણ થયું છે. ડોલવણ તાલુકાના આંબાપાણી ગામે આવેલ ઇકો ટુરીઝમ પોઇન્ટમાં પૂર્ણાં નદીના પાણી ઘુસ્યા હતા. આ સાથે જ ડાંગના ભેંસકાતરી પુલ પરથી પૂર્ણાં નદીના પાણી ફરી વળ્યા છે. આંબાપાણી ગામ નજીકથી પૂર્ણાં નદીમાં અચાનક જળસ્તર વધ્યું છે. જેથી બુધવારે સાંજના સમયે 10 જેટલા લોકોનું રેસ્ક્યૂ કરવામાં આવ્યું. 10 વ્યક્તિને નદીમાંથી બહાર કાઢી સલામત સ્થળે ખસેડવામાં આવ્યા છે.