ગુજરાતમાં આ તારીખ પછી થશે જળબંબાકાર, ભારેથી અતિભારે વરસાદની આગાહી

ગુજરાતમાં ફરી એક વખત વરસાદી માહોલ જામશે. હવામાન વિભાગ દ્વારા 25 જુલાઈથી ગુજરાતમાં વરસાદની આગાહી કરવામાં આવી છે. હવામાન વિભાગના જણાવ્યા મુજબ 25 જુલાઈ બાદ રાજ્યમાં વરસાદનું જોર વધશે. હવામાન વિભાગના અનુસાર, એક સાથે ત્રણ વરસાદી સિસ્ટમ સક્રિય થઈ છે. આ ત્રણ વરસાદી સિસ્ટમના કારણે 25 જુલાઈથી ગુજરાતમાં મન મૂકીને વરસશે મેઘરાજા. 27 અને 28 જુલાઈના રોજ ભારેથી અતિભારે વરસાદ વરસી શકે છે. રાજ્યમાં અત્યાર સુધી સીઝનનો 55 ટકા વરસાદ વરસી ચૂક્યો છે.

25 થી 29 જુલાઇના દિવસોમાં ઠેકઠેકાણે વરસાદી ઝાંપટા પડશે

ગુજરાતમાં વરસાદને લઇને હવામાન વિભાગે આગાહી કરી છે, આગામી 25 થી 29 જુલાઇના દિવસોમાં ઠેકઠેકાણે વરસાદી ઝાંપટા પડશે. છેલ્લા કેટલાક દિવસોથી મેઘરાજા વિરામ પર હતા હવે ફરીથી એક્ટિવ મૉડમાં આવવાથી વાવાઝોડા સાથે વરસાદ ખાબકશે.નવસારી, છોટા ઉદેપુર, નર્મદા, તાપી, વલસાડ અને ડાંગમાં વરસાદની આગાહી સાથે યલો એલર્ટ જાહેર કર્યું છે. 25 જુલાઈએ ડાંગ, સુરત, છોટા ઉદેપુર, તાપી, નર્મદા, વલસાડમાં હળવો વરસાદ પડી શકે છે.

26 જુલાઈએ ભારે વરસાદની ચેતવણી જારી કરવામાં આવી છે. 26 જુલાઈએ સુરત, તાપી, નર્મદા, અમરેલી, ભાવનગર, મહિસાગર, પંચમહાલ, દાહોદ, છોટા ઉદેપુર, ભરૂચ, નવસારી, ડાંગમાં વરસાદ માટે યલો એલર્ટ જાહેર કરવામાં આવ્યું છે. 27 જુલાઇએ છોટા ઉદેપુર, પંચમહાલ, દાહોદમાં ઓરેન્જ એલર્ટ જારી કરવામાં આવ્યું છે. આ સાથે જ મહેસાણા, અરવલ્લી, ખેડા, આણંદ, રાજકોટ, સુરેન્દ્રનગર, બોટાદ, અમરેલી, ભાવનગર, અમદાવાદ, પાટણ, નર્મદા, વલસાડ, નવસારી, બનાસકાંઠા, સાબરકાંઠા, ગાંધીનગર, મહિસાગર, ભરૂચ, સુરત, તાપી, ડાંગમાં વરસાદની સંભાવના છે.