Money Laundering Case: દિલ્હીના મંત્રી સત્યેન્દ્ર જૈનની વધશે મુશ્કેલી, 2.82 કરોડ રોકડા અને સોનાના સિક્કા મળ્યા

 Satyendar Jain Case: દિલ્હીના સ્વાસ્થ્ય મંત્રી સત્યેન્દ્ર જૈનની મુશ્કેલીઓ ઓછી થવાનું નામ નથી લઈ રહી. એન્ફોર્સમેન્ટ ડિરેક્ટોરેટ (ED) એ સોમવારે કોલકાતા સ્થિત કંપની સાથે સંબંધિત હવાલા વ્યવહારોના સંબંધમાં સત્યેન્દ્ર કુમાર જૈન, પૂનમ જૈન અને તેમના સહયોગીઓ અને અન્ય વ્યક્તિઓના ઘરો પર દરોડા પાડ્યા હતા. આ દરમિયાન EDને 2.82 કરોડ રૂપિયાની રોકડ રકમ અને 1.80 કિલો વજનના 133 સોનાના સિક્કા મળ્યા છે. પ્રાપ્ત માહિતી અનુસાર, દરોડામાં રામ પ્રકાશ જ્વેલર્સ પાસેથી 2.23 કરોડ રૂપિયા મળ્યા છે. જીએસ મથારુ પાસેથી 20 લાખ રૂપિયા અને વૈભવ જૈન પાસેથી 133 સોનાના સિક્કા મળી આવ્યા છે.

ઈડીએ અંકુશ જૈન, વૈભવ જૈન, નવીન જૈન અને સિદ્ધાર્થ જૈન (રામ પ્રકાશ જ્વેલર્સ પ્રાઈવેટ લિમિટેડના ડિરેક્ટર), જીએસ મથારુ, યોગેશ કુમાર જૈન (રામ પ્રકાશ જ્વેલર્સ પ્રાઈવેટ લિમિટેડના ડિરેક્ટર)ના સ્થળો પર દરોડા પાડ્યા હતા. સર્ચ દરમિયાન વિવિધ ગુનાહિત દસ્તાવેજો અને ડિજિટલ રેકોર્ડ્સ જપ્ત કરવામાં આવ્યા હતા. PMLA હેઠળ 2.82 કરોડની રોકડ રકમ અને 1.80 કિલો વજનના 133 સોનાના સિક્કા જપ્ત કરવામાં આવ્યા હતા.

AAPએ કેન્દ્ર સરકાર પર પ્રહારો કર્યા

EDના આ દરોડા પછી AAPએ કેન્દ્ર સરકારને ઘેરવાનું શરૂ કર્યું છે. દિલ્હીના સીએમ અરવિંદ કેજરીવાલે કહ્યું કે આ સમયે વડાપ્રધાન સંપૂર્ણ તાકાત સાથે આમ આદમી પાર્ટીની પાછળ છે. ખાસ કરીને દિલ્હી અને પંજાબની સરકારો પાછળ, બધી એજન્સીઓની સત્તા તમારી પાસે છે, પરંતુ ભગવાન અમારી સાથે છે.

સત્યેન્દ્ર જૈન 9 જૂન સુધી EDની કસ્ટડીમાં

AAP નેતા સૌરભ ભારદ્વાજે કહ્યું કે EDના લોકો, જે રાત્રે 7 વાગ્યે દાખલ થયા હતા, તેઓ રાત્રે 2 વાગ્યે નીકળી ગયા હતા. ED પાસે કોઈ ચોક્કસ માહિતી નથી. આને હેરેસમેન્ટ કહી શકાય. ED કેન્દ્ર સરકારના ઈશારા પર કામ કરી રહી છે. કેન્દ્ર સરકારના ઈશારે ઈડી આ પ્રકારનું વર્તન કરી રહી છે. AAP નેતા અને દિલ્હીના સ્વાસ્થ્ય મંત્રી સત્યેન્દ્ર જૈનની 30 મેના રોજ મની લોન્ડરિંગ કેસમાં ધરપકડ કરવામાં આવી હતી. આ પછી, 31 મેના રોજ, ટ્રાયલ કોર્ટે સત્યેન્દ્ર જૈનને 9 જૂન સુધી ED કસ્ટડીમાં મોકલી દીધા છે.